सागर भण्डारी
गुल्मी, माघ २ । गुल्मीको मुसिकोट नगरपालिका वडा नं ७ वामीटक्सारमा जिल्लामा अहिलेसम्मकै सर्वाधिक राशी पुरस्कार सहितको राष्ट्रिय पुरुष भलिबल प्रतियोगिता हुने भएको छ ।
गुल्मी मुसिकोट उद्योग वाणिज्य सघंले आयोजना गर्न लागेको प्रथम मुसिकोट महोत्सवको अवसरमा खुल्ला पुरुष भलिबल प्रतियोगिता सञ्चालन गर्न लागिएको सघंका अध्यक्ष सुदर्शन शाक्यले जानकारी दिनुभयो ।
प्रतियोगिताको विजेता टिमलाई १ लाख ५१ हजार रुपैयाँ नगद पुरस्कारका साथै ट्रफि र प्रमाणपत्र प्रदान गरिने उहाँले बताउनुभयो । प्रथम मुसिकोट महोत्सवको अवसर पारेर जिल्लामै अहिलेसम्मको सर्वा्धिक पुरस्कार राशीको खुल्ला राष्ट्रिय पुरुष भलिबल प्रतियोगिता आयोजना गर्न लागिएको महोत्सव प्रचार प्रसार समिति सयोंजक ज्ञानहरी सापकोटाले बताउनुभयो । प्रतियोगिताका उपविजेतालाई १ लाख १ हजार कप मेडल र प्रमाणपत्र पुरस्कार पाउने पनि उहाँले बताउनुभयो ।
प्रतियोगिता आउँदो माघ १५ गतेदेखि २६ गतेसम्म सञ्चालन हुने प्रथम गुल्मी मुसिकोट पर्यटन साँस्कृतिक औद्योगिक एवं व्यापार महोत्सवको अवसरमा हुने बताईएको छ । खुल्ला प्रतियोगीता भएकाले खेलमा जुनसुकै स्थानका पुरुष खेलाडीले सहभागी हुन पाउने उहाँले जानकारी दिनुभयो । प्रतियोगितामा भाग लिन इच्छुक खेलाडी समूहले माघ १५ गतेसम्म टिम दर्ताको आवेदन खुल्ला राखिएको छ ।
