गुल्मी, पुष १९ । बुटवलबाट ३ दर्जन मलामी सहित शव बोकेर गुल्मीको रिडीतर्फ आउँदै गरेको बस दुर्घटना हुँदा घटनास्थलमै सात जनाको मृत्यु भएको छ भने पछी उपचारको क्रममा थप एक जनाको मृत्यु भएको छ । पाल्पाको रिब्दीकोट गाउँपालिका–३, लघुवामा आइतबार बस दुर्घटना हुँदा थप ८ जना घाईते भएका छन् । शव लिएर बुटवलबाट गुल्मीको रिडी आउँदै गरेको लु१ख ७२७९ नम्बरको बस दुर्घटना भएको पाल्पाका प्रमुख जिल्ला अधिकारी जगन्नाथ पन्तले जानकारी दिए ।
बुटवलदेखि शव दाहसंस्कारका लागि गुल्मीको रुरुक्षेत्र कालीगण्डकी रिडी हिँडेको बस दुर्घटना भएको हो । प्रहरी र स्थानीयसहितको टोलीले घाइतेको उद्धार कार्य गरेको छ । चार वटा शव बाहिर देखिएको र तीनवटा शव दुर्घटनाग्रस्त बसले च्यापेकाले जेसीभी झिकाएर निकाल्ने तयारी गरेको प्रहरीले जनाएको छ ।
आईतबार बिहान करिब १०ः३० बजे तिर भएको दुर्घटनाका भएको थियो । करिब ३५ जना मलामी सवार रहेको बस दुर्घटनामा परेको थियो ।
