चर्चित नेपाली टेलिभिजन कार्यक्रम तमसोमा ज्योतिर्गमयमा पुर्व सांसद तथा नेपाली कांग्रेसका नेता चन्द्र भण्डारीसँग टिकाराम यात्रीले गर्नुभएको बिशेष कुराकानी:
पुर्व सांसद तथा नेपाली कांग्रेसका नेता चन्द्र भण्डारीले नेताहरूले काम गर्न सक्दैनन् भने भारी बोकाएर दुःख नदिउँ भनेका छन् । केही नेतृत्वको वरिपरि बस्ने नेताहरूकै कारण निकास खोज्न ढिलाइ भएको उनको भनाइ छ ।
‘नेपाली कांग्रेस निर्वाचनमा पराजित हुनुका कारण के हुन्, समीक्षा गरौं । केन्द्रीय समिति, महासमितिमा छलफल गरौं । नेताहरूले काम गर्न सक्दैनन भने ठूला भारी बोकाएर दुःख दिनु हँुदैन । निकास खोजौं भन्दा धूपमा बाँचेका साथीहरू बहसमा भन्दा गालीगलौजमा व्यस्त छन्,’ भण्डारीको भनाइ छ ।
उनले एमालेमा योगेश भट्टराईले पार्टीलाई भारी मतले जिताउने नेतृत्वलाई पार्टी एकता गरेर स–सम्मान बाहिर बस भनी अभिव्यक्ति दिएर बहस चलाएको उदाहरण दिँदै कांग्रेस पुरानो ढंगले चल्न नसक्ने उल्लेख गरेका छन् । ‘नयाँ पुस्ताले निकासका लागि सुझबुझसहितको नयाँ बहस सुरु गर्नुपर्दछ । पुरानो पुस्तालाई सम्मान गर्दै विचारसहितको राष्ट्रवादी नयाँ पुस्तामा नेतृत्व ल्याउनै पर्दछ । अब आ–आफ्नो ठाउँमा बहससहित अगाडि बढ्नै पर्दछ । भाग्य भरोसाले अब हुँदैन,’ भण्डारीले फेसबुकमार्फत बताईसकेका छन् ।
