गुल्मी, भदौ २१ । इस्मा गाउँपालिकाले सूचना प्रविधिको विकास र नागरिकको सुसुचित हुने अधिकारलाई मध्य नजर गर्दै गाउँपालिकले आफ्नै लगानीमा रेडियो सञ्चालन गर्ने भएको छ । रेडियो सन्चालनको लागि गाउँपालिकाले २५ लाख रुपैयाँ बजेट बिनियोजन समेत गरेको छ । गाउँपालिकाका हरेक गतिविधिहरु नागरिकसम्म र नागरिकका समस्याहरु गाउँपालिकासम्म ल्याउन रेडियो सञ्चालनको तयारी गरिएको गाउँपालिका कार्यकारी अधिकृत सरोज पोख्रेलले बताउनुभएको छ ।
त्यस्तै गाउँपालिकाले एक वर्षको अवधिमा चार सय घरका खरका छाना विस्थापित गरी जस्तापाता लगाइदिने भएको छ । ‘नागरिकलाई हाम्रो भर विपन्नलाई सुरक्षित घर’ भन्ने नारालाई आत्मसाथ गर्दै इस्मा गाउँपालिकाको गाउँसभामार्फत खरका छाना हटाउन एक करोड रुपैैयाँ विनियोजन गरिएको हो ।
खरका छाना विस्थापित गर्नका लागि खरका छाना भएका घरहरुकोे तथ्यांक संकलन गर्ने काम सुुरु भइसकेको गाउँपालिका कार्यकारी अधिकृत पोख्रेलले बताउनुभयो ।
गाउँसभाले सवैको घरमा स्वच्छ खानेपानीको सुविधा उपलब्ध गराउनका लागि ‘एक घर एक धारा ः टोलटोलमा संरक्षित मुहान र पँधेरा’ कार्यक्रम लागु गरेको छ । कार्यक्रम सञ्चालनका लागि एक करोड ३० लाख रुपैयाँ बजेट विनियोजन भएको कार्यकारी अधिकृत पोख्रेलले जानकारी गराउनुभयो ।
त्यस्तै विद्यालयमा छात्राहरुको सुरक्षित महिनावारीका लागि स्यानेटरी प्याडको व्यवस्था गर्नका लागि समेत बजेट विनियोजन गरिएको छ । गाउँ सभामा शिक्षा, स्वास्थ्य, कृषि, संस्कृति तथा पर्यटन, प्राविधिक सीप, सुत्केरी भत्ता बृद्धि गर्नेदेखि प्रयोगशाला स्थापना गर्नेसम्मका योजना बजेटमा समावेश गरिएको छ ।
