हुमाकान्त पोखरेल
गुल्मी, ०१ पौष । उपल्लो तम्घास माध्यमिक विद्यालय, रेसुङ्गा नगरपालिका –९ गुल्मीको ४७ औँ बार्षिकोत्सव कार्यक्रम सम्पन्न भएको छ । विगत एक हप्तादेखि विभिन्न अतिरिक्त क्रियाकलापमार्फत सुरु भएको बार्षिकोत्सव बिहीबार औपचारिक कार्यक्रमबीच सम्पन्न गरिएको हो ।
कार्यक्रममा विद्यालयको संस्थापकको रुपमा रहेका पर्शुराम पन्थी र खिमलाल ज्ञवालीलाई विद्यालयको स्तरबृद्धिको लागि महत्वपूर्ण भूमिका निर्वाह गरेको भन्दै सम्मान गरिएको छ । त्यस्तै सहायक प्रध्यानाध्यापक बाबुलाल मरासिनी, शिक्षक कृष्ण पाण्डे, सुस्मा सारु लगायतका शिक्षकहरुलाई पनि उत्कृष्ट कार्यको लागि सम्मान गरिएको छ । कार्यक्रमकै अवसरमा प्रध्यानाध्यापक पिंकी भुसालले विद्यालयको बार्षिक प्रगति प्रतिवेदन प्रस्तुत गरेकी थिइन् ।
त्यस्तै विद्यालयले संचालन गरेको विभिन्न क्रियाकलापमा उत्कृष्ट हुने विद्यार्थीहरुलाई पुरस्कार पनि वितरण गरिएको विद्यालय व्यवस्थापन समिति अध्यक्ष गणेश श्रीपालीले जानकारी दिए । कार्यक्रममा बोल्दै प्रमुख अतिथि रेसुङ्गा नगरपालिकाका मेयर डिल्लिराज भुसालले सामुदायिक विद्यालयहरुको गुणस्तर बृद्धि गरी परीक्षामा धेरैभन्दा धेरै विद्यार्थी उत्तिर्ण गराउने नगरपालिकाको उदेश्य रहेको बताए ।
पहिलेभन्दा अहिले शिक्षामा धेरै सकारात्मक परिवर्तन देखिएकोले यसलाई निरन्तरता दिनुपर्नेमा उनले जोड दिए । साथै उपल्लो तम्घास माध्यमिक विद्यालयले फरक क्षमता भएका विद्यार्थीहरुलाई पढाउनु र कृषि शिक्षा समेत संचालन गरेकोले नगरपालिकाको तर्फबाट आवश्यक सहयोग गर्ने प्रतिवद्धता पनि उनले जायर गरे । कार्यक्रममा विभिन्न जनप्रतिनिधि, विभिन्न संघ संस्थाका प्रमुख एवम् प्रतिनिधिहरुको उपस्थिति रहेको थियो ।
