काठमाडौं, ६ साउन । माल्टा लैजान्छु भनी नक्कली भिषा दिलाई ठगी गर्ने कार्यमा संलग्न एक भारतीय नागरिक पक्राउ परेका छन् । भारत उत्तर प्रदेश दिल्ली घर भई हाल काठमाडौं महानगरपालिका -९ सिनामंगल बस्ने २३ बर्षीय राहुल पाण्डेलाई काठमाडौं महानगरपालिका-१२ टेकुबाट शुक्रबार साँझ प्रहरीले पक्राउ गरेको हो ।
पाण्डेले भिभी इन्टरनेशनल प्रालि मार्फत नेपालीहरुलाई वैदेशिक रोजगारको लागि माल्टा लैजान्छु भनि नक्कली भिषा दिलउने गरेका थिए । विभिन्न कामदारहरुको भिषा प्रोसेसिङ र सेक्युरिटी डिपोजिट गर्नको लागि भन्दै पटक पटक गरी नगद उनले ६५ लाख ७० हजार ६ सय रुपैयाँ ठगी गरेको प्रहरीले जनाएको छ । भिभी इन्टरनेशनल प्रालिका संचालक दावा शेर्पाको उजुरीको आधारमा महानगरीय अपराध महाशाखाको प्रहरीले पाण्डेलाई पक्राउ गरेको हो ।
पाण्डेलाई आवश्यक कारवाहीका लागि महानगरीय प्रहरी परिसर काठमाडौं पठाइएको सो महाशाखाले जनाएको छ ।
