हुमाकान्त पोखरेल
गुल्मी, २४ जेठ । धुर्कोट गाउँपालिकामा विद्यार्थीहरुका लागि योग शिक्षा संचालन गरिएको छ । जेठ २२ गतेदेखि सुरु गरिएको योग शिक्षा जेठ २५ गते अर्थात चार दिनसम्म संचालन हुनेछ ।
गाउँपालिका भित्रका चार माध्यमिक विद्यालयका ६-६ जनाका दरले कुल २४ विद्यार्थीले योग शिक्षामा सहभागिता जनाएका छन् । जसमा पाञ्चायन माध्यमिक विद्यालय, हिमालय माध्यमिक विद्यालय, भगभती माध्यमिक विद्यालय र वाग्ला माध्यमिक विद्यालयका विद्यार्थी रहेको धुर्कोट गाउँपालिका आयुर्वेद शाखा संयोजक प्रदिप बैठाले जानकारी दिए ।
योग शिक्षा अन्तरगत आयुर्वेद जडिबुटी, जिवनशैली, दिनचर्या र रात्रीचर्याको बारेमा विद्यार्थीहरुले ज्ञान दिइनेछ । जसमा बिहानमा प्रयोगात्मक र दिउसोमा सैद्धान्तिक बिषयवस्तुहरु सिकाईने प्रशिक्षक गुल्मी आयुर्वेदका वरिष्ठ कविराज निरिक्षक नविन अर्यालले बताए । योग शिक्षाले विद्यार्थीहरुको शारीरिक तथा मानसिक पक्षको विकास गर्नुको साथै स्मरण शक्ति पनि बढाउने प्रशिक्षक अर्यालले जानकारी दिए ।
गाउँपालिका प्रमुख भुपाल पोखरेलले सामुदायिक विद्यालयका विद्यार्थीहरुलाई अनुशासनमा राखी शैक्षिक गुणस्तर बृद्धि गर्न योग शिक्षा संचालन गरिएको बताए । त्यसका साथै उनले आगामी बर्षहरुमा प्रत्येक विद्यालयमा एकजना योगा शिक्षकको व्यवस्था गरी योग शिक्षा संचालन गर्ने पनि जानकारी दिए ।
