गुल्मी, असार २७ । मृत्यु भयो भनेर परिवारले किरिया बसेको ९ दिनमा गुल्मीका १ जना पुरुष शनिबार जीवितै भेटिएका छन् । गुल्मी रुरु गाउँपालिका-५ श्यामचरण भण्डारी पाल्पाको रैनादेवी गाउँपालिकामा जीवितै भेटिएको शिलापत्र डट कमको लागि बिकास पराजुलीले खबर लेखेका छन् ।
श्यामचरण भण्डारी ९ दिनपछि जीवितै भेटिएको छिमेकी मोती पौडेलले जानकारी गराए । सामान्य बिरामी खालका श्यामचरण भण्डारी केही दिनअघि रूपन्देहीको मणिग्रामबाट हराएका थिए ।
उनी हराएपछि घरपरिवार र आफन्तले खोजतलास गरेका थिए । खोजी गर्ने काम भइरहेको अवस्थामा गुल्मी रुरुकै साघाट भन्ने ठाउँमा १ जना पुरुषको शव भेटिएको थियो ।
९ दिनअघि नांगो अवस्थामा भेटिएको शवलाई स्थानीयले श्यामचरणको भनी किटानी गरेपछि सामाजिक परम्पराअनुसार अन्त्येष्टि गरी परिवारका सदस्य किरिया बसिएको श्यामचरणका छिमेकी मोती पौडेलको भनाइ छ ।
गुल्मी रुरु गाउँपालिका-५ बोटे गाउँका स्थायी श्यामचरणको परिवार रूपन्देहीका मणिग्राममा बस्दै आएको बताइएको छ ।
