समाचार

गुल्मीमा कृषि अनुदानको टयाक्टर ठेक्कापट्टामा

टोपलाल अर्याल
गुल्मी, १२ माघ । प्रदेश ५ का विभिन्न जिल्लामा कृषि अनुदान दुरुपयोग भएका खबर पटक–पटक नआएका होइनन् । त्यो क्रम अझै रोकिएको छैन् । पछिल्लो उदाहरण मानेचौर बहुउदेश्य कृषि फर्म हो । गुल्मीको धर्कोट गाउँपालिका वडा नं ७ को यो कृषि फर्मले प्रदेशबाट ५० प्रतिशत अनुदानमा प्राप्त गरेको टयाक्टर ठेक्का पट्टामा प्रयोग गरिएको छ । यो फर्म संचालन भएको चैतमा दुई बर्ष हुन्छन् ।

कृष्ण घिमिरे, हरि भट्टराई, मधु पन्थी र नविन श्रेष्ठले संयुक्त रुपमा बहुउदेश्य कृषि फर्म मार्फत विभिन्न कृषि कर्म गरिरहेका छन् । कृषकको मागको आधारमा प्रदेश ५ को भुमि व्यावस्था, कृषि तथा सहकारी मन्त्रालयले कृषि प्रयोजनको लागि गत असारमा कृषि फर्महरुलाई टयाक्टर वितरण गरेको थियो । सोहि कार्यक्रम अन्तरगत प्राप्त ट्याक्टर मानेचौर बहुउदेश्य कृषि फर्मका संचालकहरुलेनै ठेक्कामा प्रयोग गर्दै आएका छन् ।

फर्म संचालककै ठेक्का

सुनिल समिर निर्माण सेवाले मालिका गाउँपालिका ७ को सिलादी–घमिर मोटरबाटोको स्तरउन्नती गरिरहेको छ । सो सडकको वालको पेटी ठेक्काको रुपमा फर्मका संचालक कृष्ण घिमिरे र हरि भट्टराईले लिएका छन् । वालको लागि खोलाबाट ढुङ्गा बोक्न टयाक्टर प्रयोग गरिरहेको स्वय फर्मका संचालक तथा निर्माण व्यावसायी हरि भट्टराईले स्विकार गरे । उनले आफुहरुले पनि ५० प्रतिशत लगानी गरेकाले ठेक्काको काममा लगाएको बताए । ‘मेसिनरी समान रोकेर के गर्ने, त्यसैले प्रयोग गरेका हौ’, उनले भने‘, त्यसबाट किस्ता र ड्राइभर पालेका छौ ।’ अर्का कृषि फर्म संचालक कृष्ण घिमिरेले प्रदेशले ५० प्रतिशत अनुदान दिएकै भरमा अन्यत्र प्रयोग गर्न नपाइने भए फिर्ता लैजान समेत चुनौती दिए । आफुहरुले साढे दुई सय बढि रोपनी खेतमा टयाक्टरको काम सकेपछि मात्रै ढुङ्गा बोक्ने काममा प्रयोग गरेको बताए ।

ठेक्का लगाउन दिएका छैनौ: प्रवक्ता

प्रदेश ५ को भुमि व्यावस्था, कृषि तथा सहकारी मन्त्रालयल प्रवक्ता तथा बरिष्ठ कृषि विकास अधिकृत बिनोद घिमिरेले कृषि प्रयोजनलाई दिएको टयाक्टर ठेक्का पट्टामा प्रयोग गर्न नमिल्ने बताए । उनले फर्महरुले कृषि कर्मकै लागि माग गरेकाले जति प्रतिशत लगानी गरेपनि अन्यत्र प्रयोग गर्न नहुने बताए । घिमिरेले केहि ठाउँमा ५० प्रतिशत लगानी गरेकै भ्रमममा दुरुपयोग गरेका सुचना पाए लगतै अनुगमन गरिएकाले केहि दिनमै पत्र काटिने बताए । ‘मन्त्रालयसंग फर्मले गरेको सम्झौतामा कतै समस्या छैन, टयाक्टर कृषि कर्मकै लागि दिएका हौ,’ उनले भने, ‘सवै सचेत बन्नुपर्छ ।’

थप देखाउनुहोस्
यो पनि पढ्नुहोस्:
Close
Back to top button
error: जान्नेले जसरी नि चोर्छन/सार्छन्, नजान्नेलाई खुच्चिङ :D