मुम्बइ। बलिउडमा सलमान खान र ऐश्वर्या रायको प्रेमकहानी अहिलेसम्म पनि चर्चाको विषय बन्ने गर्छ । फिल्म हम दिल दे चुके सनमको सेटबाट सुरु भएको उनीहरुको प्रेम दुई वर्षसम्म चलेको थियो । यो फिल्म सुरु हुनुभन्दा पहिलेदेखि नै सलमानले ऐश्वर्यालाई चाहने कुरा अर्को घटनाले देखाएको छ ।
कुरा १९९७ को हो । निर्देशक मंसुर खानले एक फिल्मको लागि सलमान खानलाई अफर दिएका थिए । फिल्म जोशको लागि निर्देशक खानले सलमानलाई ऐश्वर्याको दाजुको रोल गर्नको लागि अफर गरेका हुन् । तर सलमानले ऐश्वर्याको दाजु बन्नु परेकै कारण यो फिल्मको अफर अस्वीकार गरेका थिए । पछि यो रोल शाहरुख खानले गरे ।
फिल्म हम दिल दे चुके सनममा ऐश्वर्या अजय देवगनसँग फर्केर जान्छिन् । तर रमाइलो कुरा सलमानले यो फिल्मको अन्तिम सिन पनि फेर्ने कोसिस गरेका थिए । सलमान चाहन्थे फिल्ममा ऐश्वर्या आफूसँगै आउन् तर निर्देशक संजय लीला भंसालीले यो कुरा अस्वीकार गरे । -एजेन्सी
