हुमाकान्त पोखरेल
गुल्मी, ०१ कात्तिक । नेपाल कम्युनिष्ट पार्टी (एकीकृत समाजवादी) की सचिव एवं शहरी विकास मन्त्री रामकुमारी झाँक्रिले आफुहरुले पार्टी निर्माणको तीन महिने अभियान चलाउने बताएकी छिन् ।
सोमबार गुल्मीको सदरमुकाम तम्घासमा आयोजित एकीकृत समाजवादीको प्रथम जिल्ला भेलालाई सम्बोधन गर्दै नेतृ झाँक्रिले सो कुरा बताएकी हुन् ।
तीन महिनासम्म देशभरबाट कम्तिमा सात लाख संगठित सदस्य बनाउने उनले दाबी गरिन् । प्रत्येक संगठित सदस्यले निर्वाचनमा परिवारको मात्रै पनि चार भोट ल्याएमात्रै देशभरबाट नेकपा एकीकृत समाजवादीको पक्षमा कम्तिमा २८ लाख भोट पार्टीलाई प्राप्त हुने र त्यसपछि नेकपा एमाले विलाएर जाने उनले दावी गरीन् ।
प्रत्येक संगठित सदस्यले एक दिन पार्टीको लागि काम गर्ने र बाँकी छ दिन आफ्नो लागि काम गर्नेगरी योजना पार्टीले बनाएको उनको भनाई छ । पार्टीको हरेक कमिटीमा कम्तिमा ५० प्रतिशत महिला र ४० प्रतिशत ३० बर्षमुनिका युवालाई समावेश गर्ने नेतृ झाँक्रिले बताइन् ।
