गुल्मी, जेठ २ । गुल्मीमा कोरोना भाइरस संक्रमणका कारण ज्यान गुमाउनेको संख्या ४६ पुगेको छ । जिल्ला प्रशासन कार्यालय गुल्मीले आईतवार दिउँसो जारी गरेको बिवरण अनुसार पछिल्लो २४ घण्टामा ५८ जनामा कोरोना भाइरस संक्रमण पुष्टि भएको छ । पछील्लो २४ घण्टामा पिसिआर परिक्षणबाट ५६ जना र एण्टिजेन परिक्षण बाट २ जनामा कोरोना संक्रमण देखिएको हो ।
हाल जिल्लामा पिसिआर र एण्टिजेन गरी २ हजार ४८ जनाको परिक्षण गरिएको छ । दोश्रो लहरमा फैलिएको कोरोना भाइरस संक्रमितमध्ये अहिले सम्म २०६ जनाले कोरोना जितेका छन् । अहिले संक्रिय संक्रमितको संख्या ९३४ रहेको गुल्मीका सहायक प्रमुख जिल्ला अधिकारी नारायण प्रसाद भण्डारीद्वारा हस्ताक्षरित बिज्ञप्तीमा जनाईएको छ ।
गुल्मीमा अहिले ८८४ जना होम आईसोलेशनमा रहेका छन् भने ४ जनाको आईसीयुमा उपचार भईरहेको छ । त्यस्तै ४५ जनाको आईसोलेशनमा राखेर उपचार गरिरहेको छ ।
संक्रमण जोखिमलाई मध्यनजर गरी जिल्लाका विभिन्न स्थानमा १७१ बेड क्षमताको आइसोलेशन बेड तयार गरि सञ्चालनमा रहेका छन् । यस जिल्लामा कोभिड–१९ विरुद्धको पहिलो मात्राको खोप २२ हजार ५ सय ७८ जनाले लगाएका छन् । पहिलो र दोश्रो मात्राको खोप ४ हजार २६ जनाले लगाएको जनाईएको छ भने जिल्लामा अहिले उपलब्ध अक्सिजन सिलिण्डरको संख्या २२३ रहेको छ ।
नयाँ भेरिन्ट सहितको कोरोना भाइरस संक्रमण बढ्दै गएपछि गुल्मीमा यहि जेठ ४ गतेसम्म लकडाउन गरिएको छ । जिल्ला कोभिड–१९ संकट व्यवस्थापन केन्द्रको बैठकले निषेधाज्ञाको समयमा अत्यावश्यक काम बाहेक घर बाहिर ननिस्कन जिल्लाबासीलाई आग्रह गरेको छ ।
