बाग्लुङ, फागुन २६ । उत्तर–दक्षिण जोड्ने कालीगण्डकी करिडोरको बाग्लुङ–गुल्मी सडकलाई चौडा पार्न थालिएको छ । करिडोर स्तरोन्नति गर्न सरकारले २० करोड रुपैयाँको लागतमा नेपाली सेनालाई जिम्मा दिएपछि काम सुरु भएको हो ।
कालीगण्डकी करिडोरलाई १० मिटर कायम गर्न बाग्लुङमा १० करोड र गुल्मी खण्डमा १० करोड रुपैयाँ निकासा गरिएको छ ।
नेपाली सेनाले २०७५ माघ १९ देखि २०७६ असार महिनासम्म काम सम्पन्न गर्ने गरी निर्माणको काम अघि बढाएको ईमेज खबर डट कमले खबर छपेको छ ।
सडकको स्तरोन्नतिपछि कालोपत्रे गर्न सडक विभागलाई हस्तान्तरण गर्ने नेपाली सेनाको निर्माण कार्यदलले जनाएको छ ।
करिडोरअन्तर्गत बाग्लुङ खण्डको मालढुंगादेखि बलेवा एयरपोर्टको सडक चौडा पार्ने काम तिव्र गतिमा भइरहेको नेपाली सेनाका अवकास प्राप्त प्रमुख सेनानी इन्जिनियर रेश्मीराज भट्टराईले बताए ।
बाग्लुङ खण्डको ३८ किलोमिटर र गुल्मीको ८० किलोमिटर सडकको ट्रयाक खोल्ने काम सकेसँगै सेनाले चौडा पार्ने काम अगाडि बढाएको हो ।
चीनको कोरलादेखि भारतको सुनौली नाका जोड्ने छोटो दुरीको यो सडक आयोजनालाई त्रिदेशीय व्यापार तथा पारवहनमा महत्वपूर्ण नाकाको रुपमा लिइएको छ ।
