लन्डन, जनवरी १४ । कोरोना संक्रमणबाट बेलायतमा गुल्मी घर भएका थप एक जना पुर्व गोर्खाले ज्यान गुमाएका छन् । गुल्मीको कालिगण्डकी गाउँपालिका वडा नं ४ वोकेंग पुर्तिघाट स्थाई घर भई लन्डनको ग्रीनफोर्डमा बस्दै आएका ५९ वर्षीय लालप्रसाद सलामीको कोरोना संक्रमणका कारण निधन भएको हो ।
यो पनि पढ्नुस्: गुल्मीका एक दम्पती जस्ले बेलायतमा ४ दिनको फरकमा ज्यान गुमाए
गत अक्टोबर महिनामै संक्रमण भएपछि अस्पताल भर्ना भएका सलामीको गत सोमबार लण्डन स्थित रोयल ब्रम्पटन हस्पिटलमा निधन भएको बेलायतबाट सन्चालित नेपाली लिंक डट कमले समाचार छापेको छ । श्रीमती र दुई छोरा सहित लण्डनको ग्रीनफोर्ड बस्दै आएका सलामीको बाबुआमा भने नेपालमै रहेका छन् ।
‘शुरुमा अक्टोबरमै कोभिड संक्रमण भएर अस्पताल भर्ना हुनुभएको थियो । एक महिना बढी आइसीयूमै राखेर उपचार गरिएपछि सुधार भयो भनेर सामान्य वार्डमा सारिएको थियो’, गुल्मी समाज यूकेका उपाध्यक्ष मती प्रसाद पुनले भने, ‘पछि फेरि उहाँको स्वास्थ्य अवस्था बिग्रिंदै गयो र सोमबार निधन भयो ।’
मृतक सलामी गुल्मी जिल्ला समाज यूके, मगर संघ यूके वेम्बली मिडलसेक्स शाखा लगायतमा पनि आजीवन सदस्य थिए । सलामीको निधनमा उनी आबद्ध संस्थाहरुले शोक व्यक्त गरेका छन् ।
यकिन तथ्यांक नभएपनि हालसम्म सार्वजनिक भएअनुसार बेलायतमा कोरोना संक्रमणबाट ७५ जनाभन्दा बढी नेपालीको निधन भएको छ । जसमध्ये अधिकांश भूतपूर्व गोर्खा र तीनका परिवारका सदस्य छन् ।
