लण्डन, ०२ फेब्रुअरी । बेलायती सेनामा कार्यरत एक गोरखा सैनिक बेलायती सेनाको उच्च अधिकृतमा बढुवा भएका छन् ।
हाल ११ इन्फेन्ट्री बटालियनमा कार्यरत स्याङ्जाका मेजर देवेन्द्र आलेले बेलायती सेनाको सातौँ वरियतामा रहेको लेफ्टिनेण्ट कर्णेल पदमा बढुवा हुने दुर्लभ अवसर पाएका हुन् । गत बिहीबार बसेको छनौट बोर्डले आलेलाई सो पदमा बढुवा गरेको बिभिन्न मिडियाहरुले समाचार प्रकाशित गरेका । ५१ वर्षीय आले विगत ३० वर्षदेखि बेलायती सेनामा कार्यरत छन् ।
पुख्र्याैली घर स्याङ्जा बहाकोट भञ्ज्याङ भएका आलेका बुवा क्याप्टेन मोतिप्रसाद पनि ब्रिटिश सेनामै थिए । यसैक्रममा आलेको जन्म सिंगापुरमा भयो भने पढाइ बढाइ हङकङ र नेपालमा भयो । हङकङको गोरखा स्कुलबाट एसएलसी गरेका आलेले अमृत साइन्स कलेज काठमाडौँमा बायलोजीमा आइस्सी गरे । त्यसपछि देहरादुन गएर पुनः बायलोजीमा प्लस टु गरे । फर्केर त्रिचन्द्र कलेजमा बीएस्सी पढ्दापढ्दै उनी बेलायती सेनामा भर्ती भएका हुन्
।
गोरखा भर्तीको २०० वर्षभन्दा लामो इतिहासमा सो पदमा पुग्ने अवसर पाँचजना मात्र गोरखाले पाएका हुन् । यसअघि लालबहादुर पुन, विजय रावत, यमबहादुर राना र टोलबहादुर खाम्चा सो पदमा पुगेका थिए । जसमध्ये खाम्चा मात्र सेवारत छन् भने अरु सबै सेवानिवृत्त भइसकेका छन् ।
