टोपलाल अर्याल
गुल्मी, ७ माघ । गुल्मीको इस्मा गाउँपालिका १ हस्तिचौर झर्ना नजिकै ट्याक्टर दुर्घटना भएको छ । दुर्घटनामा चालक सहित पाँच जना घाइते भएका छन् । घाइते मध्ये तीनको अवस्था गम्भिर रहेको जिल्ला प्रहरी कार्यालय गुल्मीले जनाएको छ ।
कालिका कन्ट्रसनको लु १ त ८४४४ नम्बरको ट्याक्टर दुर्घटनामा चालक धुर्कोट गाउँपालिका ७ का २२ बर्षीय विकास नेपाली र रोल्पा सुनिलमुर्ति गाउँपालिका ७ का २१ बर्षीय सुरजमान रोक्का मगर घाइते भएको जिल्ला प्रहरी कार्यालयका प्रहरी निरिक्षक रबिन्द्र खड्काले बताए ।
त्यस्तै रोल्पा सुनिल मुर्ति गाउँपालिका ७ कै २३ बर्षीय रुपेन्द्र विक र १५ बर्षीय मनिराम रोक्का मगर घाइते भएको खड्काले बताए । घाइते मध्ये सुरजमान रोक्का मगरको अवस्था गम्भिर रहेको छ । उनलाई जिल्ला अस्पताल तम्घासमा सामान्य उपचारपछि पाल्पा रेफर गरिएको जिल्ला प्रहरी कार्यालय गुल्मीले जनाएको छ । ट्याक्टर सडकबाट ४० मिटर तल खसेको छ ।
