लन्डन । एनआरएनए यूकेको ९ सेप्टेम्बरमा हुने निर्वाचनमा संघका सचिव फडिन्द्र भट्टराईले महासचिवको उम्मेदवारी दिने घोषणा गरेका छन् । आधिकारिक मनोनयन दर्ता गर्ने समय आउन तीन दिन बांकी रहंदा भट्टराईले बिहीवार उम्मेदवारी दिने घोषणा गरेका हुन् ।
गुल्मी मुसिकोट नपा स्थाई घर भई हाल लण्डनमा बसोबास गर्ने भट्टराईले प्लमस्टिडस्थित चौतारी रेष्टुरेन्टमा साउथ इष्ट लन्डन क्षेत्रका सामाजिक अगुवाहरुलाई साक्षी राखेर उम्मेदवारी दिने घोषणा गरे ।
दुई दशकदेखि बेलायत रहेका गुल्मी जिल्ला समाज यूकेका वर्तमान उपाध्यक्ष भट्टराई पत्रकारिता, साहित्य र समाजसेवामा उत्तिकै सक्रिय छन् । एनआरएनए यूकेमा सदस्य र सचिवको जिम्मेवारी वहन गरिसकेका उनले संघमा सामाजिक संरचनालाई जोडेर समावेशी रुपमा लैजान चुनौति रहेको बताए । ‘क्षेत्रीय प्रतिनिधित्वको चुनौति पनि छ’, भट्टराईले घोषणासभामा भने, ‘सबै चुनौति सामना गर्न म तयार छु ।’
वक्ताहरुले संस्थालाई गति दिन महासचिव पद महत्वपूर्ण रहने र भट्टराईमा त्यसको नेतृत्व गर्न सक्ने खुबी भएको चर्चा गरेका थिए ।
