घटना-दुर्घटनाजिल्ला समाचार

अविरल बर्षाका कारण घर बगाउँदा १८ महिने बालकको मृत्यु

हुमाकान्त पोखरेल
गुल्मी, १९ असार । गुल्मीमा अविरल बर्षाका कारण एकजनाको मृत्यु भएको छ भने एकजना वेपत्ता भएका छन् । गएराति करिब १ बजेबाट भएको बर्षाका कारण इस्मा गाउँपालिकामा एकजनाको मृत्यु भएको छ भने मुसिकोट नगरपालिकामा एकजना वेपत्ता भएका छन् । इस्मा गाउँपालिका वडा नम्बर १ मल्दीमा एउटा घर बगाउँदा एकजनाको मृत्यु भएको छ भने एकजनाको जिवितै उद्धार गरिएको छ । १८ महिनाको छोरा सिरु सारुकोे पहिरोमा परेर मृत्यु भएको वडाध्यक्ष चुरा बहादुर खत्रीले जानकारी दिए । मृतक बच्चाको आमाको भने गाउँलले घटनास्थलबाट जिवितै उद्धार गरेका छन् । घाइतेलाई थप उपचार गर्न अस्पतालसम्म लैजानको लागि पहिरोले सडक अवरुद्ध भएकोले लैजान सकिएको छैन ।

मुसिकोट नगरपालिका वडा नम्बर २ दलुङ निवासी भागिरथ घिमिरे वेपत्ता भएको नगरपालिका उप–प्रमुख कमला शर्माले जानकारी दिइन् । उनको अहिले खोजिकार्य भइरहे पनि भेटिएका छैनन् । सोहि बर्षाले दुर्गा सूर्यवशींको गोठ माथिबाट आएको पहिरोले पुरिदा गोठमा भएका सबै जनावर मरेका छन् भने थप सात घर उच्च जोखिममा रहेको नगरपालिका उप–प्रमुख शर्माले बताइन् ।

प्रतिकुल मौसमका कारण घटनाबारे सबै विवरण आइसकेको छैन । अहिले जिल्ला प्रहरी कार्यालयको समुह घटनास्थलतर्फ जाँदै गरेकोले प्रहरी कार्यालयमा पनि घटनाबारे बृस्तित जानकारी नभएको प्रहरी उपरिक्षक राजेन्द्रसिहं खड्काले बताए । गएराति परेको अविरल बर्षाले जिल्लाका मुसिकोट नगरपालिका, इस्मा गाउँपालिका लगायत अधिकाशं ठाउँका सडक अवरुद्ध भएका छन् । गएराति परेको अविरल बर्षाका कारण जिल्लाका अन्य ठाउँमा पनि क्षति भएको हुनसक्ने आँकलन गरिएको छ । तर धेरै दुर्गम बस्ती, फोनको टावरले काम नगर्ने र सडक अवरुद्ध हुँदा क्षतिको विवरण र पीडितलाई उद्धार गर्न कठिनाई भएको छ ।

थप देखाउनुहोस्
यो पनि पढ्नुहोस्:
Close
Back to top button
error: जान्नेले जसरी नि चोर्छन/सार्छन्, नजान्नेलाई खुच्चिङ :D