६ पुस, दाङ । दाङको तलुसीपुर नगरपालिका-३ राम्री भन्ने ठाउँमा शैक्षिक भ्रमणमा गएका विद्यार्थीहरू चढेको बस दुर्घटना हुँदा १६ जनाको मृत्यु भएको छ ।
दुर्घटनामा ११ जना घाइते भएका छन् ।
बोटनीसम्बन्धी प्राक्टिकलको भ्रमणको लागि सल्यानको छायाक्षेत्र गएर फर्किएका घोराहीको कृष्णसेन इच्छुक पोलिटेक्निकल इन्ष्टिच्युटका विद्यार्थीहरू चढेको बा ४ ख ९७६६ नम्बरको बस सडकबाट अन्दाजी ६/७ सय मिटर तल खसको हो ।
दुर्घटनास्थलमा ३ महिला १३ पुरुषको जम्मा १६ शव फेला परेको तर सनाखत हुन बाँकी रहेको दाङ प्रहरीले जनाएको छ ।
दुर्घटनामा घाइते भएका ११ जनालाई उपचारका लागि राप्ती अञ्चल अस्पतालमा ल्याइएको छ । उनीहरू मध्ये केहीको अवस्था गम्भीर छ ।
बसमा ३४ जना विद्यार्थी, दुई शिक्षक र चालक थिए । -अन्लाईनखबर डट कमबाट
