सन्तोष महतारा
गुल्मी, २२ फागुन । महिला उद्यमी संघ गुल्मीको अध्यक्षमा निर्मला केसी सर्वसम्मत निर्वाचित भएको छन् । आइतबार संघको प्रारम्भिक साधारणसभाबाट गुल्मी जिल्लामा रहेका महिला उद्यमीहरूको साझा संस्था महिला उद्यमी संघ गुल्मी नेपालको अध्यक्षमा केसी सर्वसम्मत निर्वाचित भएकी हुन् ।
जसको उपाध्यक्षमा गंगादेवी पाण्डे, सचिवमा जमुना न्यौपाने र कोषाध्यक्षमा श्यामकला भलामीसहित ११ सदस्यीय महिला उद्यमी संघ गठन भएको छ । प्रारम्भिक साधरणसभा कार्यक्रममा तदर्थ समितिकी कोषाध्यक्ष श्यामकला भलामीले कोषाध्यक्षको र तदर्थ समितिकी सचिव जमुना न्यौपानेले अहिलेसम्मको प्रतिवेदन प्रस्तुत गरेका हुन् ।
साधरणसभामा प्रमुख अतिथि महिला उद्यमी संघ लुम्बिनी प्रदेशकी सदस्य अनिशा केसीले महिलाहरु आत्मनिर्भर बन्न र उद्यमशील बन्न आवश्यक रहेको बताइन् । “स्थानीय तहसँग समन्वय गरेर महिलामुखी कामहरू हामीले गरेका छौं ।” प्रमुख अतिथि केसीले भनिन्, “गुल्मीमा पनि सबै महिला उद्यमी बन्नुपर्छ ।” प्रदेशको तर्फबाट सधैं सहयोग हुने उनले बताइन् ।
संघको कार्यालय रेसुङ्गा नगरपालिका वडा नम्बर ८ मा रहेको छ । संघको प्रारम्भिक साधरणासभाबाट निर्वाचित अध्यक्ष निर्मला केसीले अब आफूहरुले महिला उद्यमीहरूलाई संघमा आबद्ध गराउदै जाने बताइन् । महिला उद्यमीहरूको हकहितमा एकताबद्ध बनाउनका लागि आफूहरू निरन्तर खटिएको संघकी अध्यक्ष केसीको भनाइ रहेको छ । देशभर विस्तार भइसकेको महिला उद्यमी संघ गुल्मीमा अहिले खुलेको हो ।
