हुमाकान्त पोखरेल
गुल्मी, २६ वैशाख । मदाने गाउँपालिकाले संचालन गरेको कोभिड–१९ अस्पतालबाट सात बर्षिया बालकले कोरोना जितेका छन् । मदाने गाउँपालिका– १ अग्लुङका सात बर्षिया बालक राजेश राउतले गाउँकै अस्थायी कोभिड अस्पतालबाट कोरोना जितेका हुन् । उनलाई श्वास फेर्न गाहे हुने र ज्वरो आएपछि अभिभावकले वैशाख २० गते स्वास्थ्य चौकी लगेका थिए ।
स्वास्थ्यकर्मीले कोरोनाको आशकांमा एन्टिजेन्ट परीक्षण गर्दा कोरोना पोजेटिभ आयो । त्यसपछि सोही दिन नै गाउँपालिकाले वडा नम्बर ४ म्यालपोखरीमा संचालन गरेको अस्थायी कोभिड अस्पतालमा भर्ना गरियो । उनलाई गाउँपालिकाले खरिद गरेको अक्सिजन दिएको र अन्य भिटामिनको सहायताले कोरोना निको भई पाचौँ दिनमा शनिबार साँझ डिस्चार्ज गरिएको गाउँपालिकाका स्वास्थ्य संयोजक तिर्थराज पन्थीले बताए ।
कोरोना संक्रमितको उपचारका लागि म्यालपोखरीमा १० शैयाको अस्थायी कोभिड– १९ अस्पताल बनाएको छ । जसमा तीनओटा अक्सिजन प्लान्ट र ६ ओटा अक्सिजन सिलिन्डर छन् ।
