हुमाकान्त पोखरेल
गुल्मी, ०२ फागुन । धुर्कोट गाउँपालिकाको वडा नम्बर १ नयाँगाउँ र वडा नम्बर ४ जैसिथोक जोड्न ठुल्दीमा पक्की पुल निर्माण हुने भएको छ । पुलको आइतबार गाउँपालिकाका अध्यक्ष भूपाल पोखरेलले शिलन्यास गरे ।
कुल तीन करोड ४१ लाख १४ हजार ४१९ रुपैँया ७४ पैसामा निर्माण हुन लागेको पुल आगामी पौष १७ गतेभित्र सक्नुपर्नेछ । पुलको अञ्जना श्रेष्ठ जेभिले निर्माण जिम्मा पाएको छ । शिलन्यास कार्यक्रममा बोल्दै गाउँपालिका अध्यक्ष पोखरेलले ठुल्दीमा निर्माण हुन लागेको पुल गुल्मीमै पहिलो पटक पालिकाले निर्माण गर्न लागेको दाबी गरे ।
गाउँपालिका उपाध्यक्ष शिव बहादुर खत्रीले निर्वाचनमा गरेको प्रतिवद्धताअनुसार काम हुन लागेको भन्दै खुसि व्यक्त गरे । पुल बनेपछि मुख्यत नयाँगाउँका नागरिकहरुलाई पालिका केन्द्रसम्म जान धेरै सजिलो हुने खत्रीले बताए ।
