अनिल खत्री
२५ फागुन, गुल्मी । गुल्मी प्रहरी प्रमुख प्रहरी उपरिक्षक (एसपी) गोपलचन्द्र भट्टराईले जिल्लाका पत्रकारसँग परिचयात्मक कार्यक्रम गरेका छन् । केहि दिन अघि सरुवा भएर गुल्मी आएका भट्टराईले जिल्ला स्थित बिभिन्न सञ्चार माध्यममा काम गर्ने पत्रकारहरुसँग जिल्लाको वस्तु स्थितीको बारेमा जानकारी लिएका थिए ।
भेटघाटमा प्रहरी प्रमुख (एसपी) भट्टराईले जिल्लामा प्रहरी र नागरिकसँगको दुरीलाई नजिक ल्याउने काम गर्ने बताए । उनले जिल्लामा पछिल्ला केहि महिनामा घटेका अपराधिक घटनाहरुले गर्दा प्रहरी र नागरिक बिच दुरी बढेको बताए ।
उनले त्यो दुरीलाई नजिक ल्याउने काम आफनो मुख्य जिम्मेवारी रहेको बताए । कुनैपनि घटनाहरुमा सफल अनुसन्धान गर्न नागरिक र प्रहरी नजिक हुनुपर्नेमा जोड दिए ।
जिल्लालाई शान्ति सुरक्षाका लागि आफु सधैँ तत्पर रहने बताए । उनले जिल्लामा शान्ति सुरक्षा कायम गर्ने सवालमा पत्रकारहरुको सहयोगको अपेक्षा गरेको बताए ।
पत्रकारहरुले जिल्लामा पछिल्ला केहि महिना यता घटेका तर दोषी पत्ता नलागेका जघन्य घटनाहरुमा गहिरो अनुसन्धान गर्न ध्यानाकषण गराएका थिए ।
यस अघिका एसपी प्रविणलाल श्रेष्ठको सरुवा भएपछि नयाँ प्रमुखमा एसपी भट्टराई आएका हुन् । यस अघिका एसपी श्रेष्ठ गत भदौमा गुल्मी जिल्ला प्रहरी प्रमुखको जिम्मेवारीको रुपमा आएका थिए ।
तर उनले जिल्लामा पछिल्ला केहि घटनामा सफल अनुसन्धान नगरेको स्थानीयको चौतफी बिरोध भएपछि सरुवा भएको थियो ।