टोपलाल अर्याल
गुल्मी, ५ कार्तिक । गुल्मीमा गाई काट्ने चार जना पक्राउ परेका छन् । शुक्रबार राति मालिका गाउँपालिका २ का २२ बर्षीय रमेश विक, २८ बर्षीय महलाल विक, ६१ बर्षीय टोप बहादुर रसाइली र ३५ बर्षीय तारा विक पक्राउ परेको जिल्ला प्रहरी कार्यालय गुल्मीमा प्रमुख प्रहरी उपरिक्षक अर्जुन रानाभाटले जानकारी दिए ।
दर्लिङ्गमा गाई काटिरहेको सूचनाको आधारमा पौदी अमराई प्रहरी चौकीका इन्चार्ज प्रहरी सहायक निरिक्षक भविश्वर विकसहितको टोली घटनास्थल पुगको थियो । सोहि क्रममा गाईको टाउको, पुच्छर, दुई खुट्टा, छाला र मासुसहित चार जनालाई प्रहरीले रङ्गेहात पक्राउ गरेको रानाभाटले बताए । उनीहरुलाई थप अनुसन्धानको लागि जिल्ला प्रहरी कार्यालय गुल्मी ल्याउने काम भइरहेको प्रहरीले जनाएको छ ।
नेटा दर्लिङ्गमा गाई काट्ने बिषय सामान्य बन्दै गएको छ । बिगतमा पनि त्यस स्थानमा गाई काटेको आरोपमा थुप्रै व्यक्ति पक्राउ परेका छन् । ०७८ जेठमा दुई युवाले एक हल गोरु मारेका थिए । मालिका २ को पाटाखर्कमा गोरु मारेर पित्त निकालेको घटना सेलाउन नपाउँदै तीन दिनपछि गाई काटेर मासु खाएको आरोपमा दर्लिङ्गको लिलिङ्गमा दुई युवालाई प्रहरीले पक्राउ गरेको थियो ।
स्थानीय विपन्न दलित तथा जनजाती बस्तीमा चुनावको बेलामा गाई वा गोरु काटेर भोज खुवाउने गरिएको स्थानीय बताउँछन् । तर, अन्तिममा सोझा र विपन्न व्यक्तिहरु फस्ने गरेको स्थानीय एक व्यक्तिले गुनासो गरे । ‘नेताले काम मासु काट्न लगाएर सोझा नागरिक फस्ने गरेका छन् । सिमित व्यक्तिको लागि कसैले गाई वा गोरु काट्ने हिम्मत गर्दैनन्,’उनले भने,‘लगाउने नेता वा व्यक्तिका बारेमा भण्डाफोर नगरे बर्षेनी गरिव व्यक्ति जेल जाने भए ।’
