काठमाडौ । महानगरीय प्रहरी अपराध महाशाखाबाट सादा पोशाकमा खटिएको प्रहरी टोलीले भारतको नयाँ दिल्ली हुँदै क्यानडा, जापान तथा युरोप पठाउने भन्दै ठगी गर्ने समूहलाई पक्रा गरेको छ ।
प्रहरीले ठगी गर्ने गुल्मी मुसीकोट घर भई नयाँ दिल्लीमा बस्ने नारायण घिमिरे सहित पाँच जनालाई बुधबार ठमेलको होटल इन्काउन्टरबाट पक्राउ गरेको हो । घिमिरेले नयाँ दिल्लीमा ग्लोबल ट्रेडिङ कन्सल्टेन्सी तथा
काठमाडौको पुतलीसडकमा निकिता ग्लोबल कन्सल्टेन्सी सञ्चालन गरी ठगी गर्दै आएका थिए ।
पक्राउ पर्नेमा घिमिरे सहित रुपेन्देही कालिकानगरका झपेन्द्र थापामगर, अर्घाखाँची छत्रदेवका अर्जुन अर्याल, उत्तरप्रदेश भारतका संदिप सिंह र सिलगुढी भारतका रोनाल्ड गहतराज रहेका छन् ।
उनीहरुको साथबाट १९ थान नेपाली राहदानी, २५ थान बंगलादेशी राहदानी र १ थान भारतीय राहदानी एवं ११ थान पुलिस रिपोर्ट र अन्य कागजात फेला पारिएको प्रहरीले जनाएको छ । पक्राउ परेका उनीहरुलाई अनुसन्धान र कारबाहीका लागि वैदेशिक रोजगार विभाग बुद्दनगर पठाइको प्रहरी जनाएको छ ।
