टोपलाल अर्याल
गुल्मी, १६ फागुन। संयुक्त राष्ट्रसंघका पुर्व सहायक महासचिव कुलचन्द्र गौतमले पुस्तक बेचेर आशा अपाङ्ग केन्द्रलाई सहयोग गर्ने भएका छन् । जन्मघर इस्मा गाउँपालिका ६ अम्मरपुरमा निशुल्क स्वास्थ्य शिविर लिएर आएका गौतमले बिहिबार आशा अपाङ्ग केन्द्रको अवलोकन गरेका थिए ।
अबलोकनपछि गौतमले अपाङ्गहरुको क्षेत्रमा काम गर्ने बिषय निकै चुनौतिपूर्ण भएकाले संस्थाले अहिलेसम्म गरेका कामको प्रसंसा गरे । साथै आशा अपाङ्ग केन्द्रको कामबाट प्रभावित बनेका गौतमले आफुले लेखेको ‘ग्लोवल सिटिजन फर्म गुल्मी’ नामको पुस्तक बिक्रीबाट प्राप्त हुने रकम सहयोग गर्ने प्रतिवद्धता जनाए । उनले नेपालदेखि संयुक्त राष्ट्रसंघसम्मको यात्राका जीवन भोगाई समेटेर पुस्तक लेखेका छन् ।
अंग्रेजीमा लेखिएको यो पुस्तक सन् २०१८ मा प्रकाशन गरिएको गौतमले बताए । अहिले नेपालीमा अनुवाद गर्ने काम अन्तिम अवस्थामा रहेकोले अरु सवै प्रक्रिया पुरा गरेर सके आउने जुलाई वा सेप्टेम्बरसम्म प्रकाशन गर्ने उनले बताए । ‘आशा अपाङ्ग केन्द्रप्रति परिचित थिएँ, तर संस्थामै आउन पाएको थिइन,’उनले भने,‘ अहिले भेट्न पाएँ खुसी छु, आउने दिनमा अन्य सद्भाव र सहयोग रहनेछ ।’
आशा अपाङ्ग केन्द्रका अध्यक्ष जर्नादन घिमिरे र व्यावस्थापक गंगा रायमाझीले अहिलेसम्म संस्थाले गरेका काम र अवस्थाको बारेमा जानकारी गराएका थिए । ०६३ सालमा स्थापना गरेको आशा अपाङ्ग केन्द्रले अपाङ्गता भएका व्यक्तिको स्वास्थ्य जाँच र परामर्श, शिक्षा र व्यावसायीक तालिम प्रदान गरि पुर्नस्थापना गर्ने कार्य गर्दै आएको छ ।
