२ जेठ, गुल्मी । गुल्मीमा विद्युत आउने जाने समस्याले उपभोक्ताले सास्ती व्यहोर्नु परेको छ । कम भोल्टेजका कारण विद्युत आपूर्तिमा समस्या आउने गरेको हो ।
आपूर्ति सहज र नियमित बनाउनका लागि १३२ केभीए लाइन बिस्तारको काम सुरु भए पनि २ वर्षपछि मात्रै काम सम्पन्न हुने नेपाल विद्युत प्राधिकरण गुल्मी वितरण केन्द्रका प्रमुख नारायण अर्यालले बताए ।
अहिले तम्घासको उनायचौरमा १३२ केभीए लाइनको बिस्तारका लागि टेन्डर भइ सम्झौता भएको प्रमुख आचार्यले जानकारी दिए । रेसुङ्गा नगरपालिका वडा नम्बर ७ को उनायचौरमा र सुसिकोट नगरपालिकाको पौदीअमराइमा सब स्टेशनको लागि प्रक्रिया अघि बढेको छ ।
१३२ केभीए लाइनको सवस्टेशन बनेपछि कपिलवस्तुबाट अर्घाखाँची हुँदै गुल्मीको उनाएचौर पौदीअमराई हुँदै बाग्लुङ लगिने छ ।
लामो दुरीबाट बिधुत ल्याउनु पर्ने बाध्यता र ठाउँ-ठाउँमा आउने अबरोध र हावाहुरीका कारण पनि समस्या हुदै आएको प्रमुख अर्यालले बताए । लामो दुरीबाट बिधुत गुल्मी ल्याउनु पर्ने समस्या भएकै कारण यस्तो अबस्था आएको कार्यालयले जनाएको छ ।
गुल्मी सदरमुकाम तम्घासमा बुटवलको योगिकुटीबाट चौराहा, चौराहाबाट पाल्पा, पाल्पाबाट रिडी, रिडीबाट बिरवास र बिरवास हुँदै विद्युत लाइन आउँछ । यो २६५ किलोमिटरको दूरी हो ।
गुल्मी कालिगण्डकी प्रभाबित क्षेत्र भएकोले लोडसेडिङ्ग नगर्ने सहमति पनि भएको थियो । अन्य दुईवटा हाइड्रो पावरहाउसबाट पनि बिद्युत निकालिएको छ । तर, विद्युत नियमित हुन सकेको छैन ।
कालिगण्डकीबाट निकालिएको बिद्युत बुटवल प्रशारण लाइनमा समाबेश गरी बितरण गरिन्छ । बिद्युत बिस्तार हुने मुख्य लाइमा गाडिएका पोल तार जीर्ण बनिसकेका छन् ।
जिल्लामा रहेका दुईवटा पावरहाउसबाट पनि सुख्खा समयमा कम मात्रामा विद्युत उत्पादन हुने गरेकोले समस्या हुने गरेको छ । -अन्लाईन खबर डट कमबाट
