टोपलाल अर्याल
गुल्मी, २८ चैत । जिल्ला प्रहरी कार्यालय गुल्मीले बाबुको हत्या गरेको आरोपमा छोरालाई पक्राउ गरेको छ । इस्मा गाउँपालिका २ हस्तिचौर पालुखाका ४६ बर्षीय टेक बहादुर कुमालको हत्या गरेको आरोपमा २९ बर्षीय अर्जुन कुमाललाई प्रहरीले शुक्रबार पक्राउ गरेको जिल्ला प्रहरी कार्यालय गुल्मीमा प्रहरी निरिक्षक चुरामणी पुनले बताए ।
पक्राउ परेका छोरा सुस्तमनस्थिति भएका छन् । बिहिबार राती बाबु–छोरा झगडा गरेका थिए । सोहि क्रममा छोराको कुटपीटबाट घाइते भएका बाबुलाई आमाले घरमा ल्याएर सुताएकी थिइन् । शुक्रबार बिहान एक्कासी उल्टी भएर मृत्यु भएको इस्मा गाउँपालिका २ का वडाध्यक्ष टीका बहादुर रेश्मीले बताए ।
प्रहरीको अगाडी छोराले बाबुलाई कुटपीट गरेको स्विकार गरेको रेश्मीले बताए । प्रहरी निरिक्षक चुरामणी पुनले शब पोष्टमार्टम र घटनाको बिषयमा थप अनुसन्धान भइरहेको जानकारी दिए ।
