गुल्मी, भाद्र–३० । गुल्मीको एक मात्र रेसुङ्गा टेलिभिजनको दोश्रो वार्षिकत्सवको अन्तिम तयारी पुरा भएको छ । भोली भदौ ३१ गते तम्घासको चिदीचौरमा विविध सांस्कृतिक कार्यक्रम सहित भव्य रुपमा सम्पन्न हुन गईरहेको वार्षिकोत्सवको नेपाल पत्रकार महासंघका केन्द्रिय अध्यक्ष गोविन्द आचार्यले उद्घाटन गर्ने कार्यक्रम रहेको छ ।
आज साँझ नै अध्यक्ष आचार्य सहितका विशेष अतिथीहरु तम्घास आई पुग्ने र टेलिभिजन परिवारले गुल्मीको ऐतिहाँसिक एवं धार्मिक स्थान रेसुङ्गाको महादेव पोखरीमा स्वागत कार्यक्रमको आयोजना गरेको छ । कार्यक्रम भोली दिउँसो दिनको साढे १२ वजे देखि सांङ्गेतिक मनोरञ्जनका साथ सुरु हुने भएको छ । कार्यक्रममा लोक गायक राजन कार्की , हास्य कलाकार गोकुल कंडेल , मोडल एवं नायिका तुल्सी सापकोटा , गायिका शिलु भट्टराई , तुल्सीङ्ग रनपछाई , महेन्द्र भण्डारी, गणेश अधिकारी , अर्जुन कुँवर र यमुना अर्याल र अन्य स्थानिय कलाकारहरुको वेजोड प्रस्तुती रहने भएको छ ।
वार्षिकोत्सव कार्यक्रमको रेसुङ्गा टेलिभिजनले प्रत्यक्ष प्रशारण गर्ने छ । कार्यक्रमको होलायन्ड टेक्टर सप्लार्यस मुख्य प्रायोजक रहेको छ । त्यस्तै अन्य प्रायोजकहरुमा लाली चाउँचाउ , गुल्मी उद्योग वाणिज्य संघ , कोरियन रेष्टुरेण्ट सुख्खा नगर बुटवल, श्रेष्ठ टेलरिङ्ग वुटवल लगायत रहेको रेसुङ्गा टेलिभिजनका समाचार प्रमुख प्रेम सुनारले जानकारी दिए ।
