१६ असोज, बुटवल । पहिरो पन्छाएर दुई तर्फी सडक खुलाउनका लागि बुटवल-पाल्पा सिद्धार्थ राजमार्ग बन्द गरिएको छ । आइतबार बिहान ६ बजेबाट सडक सुचारु भएको भएपनि सडकलाई दुईतर्फी रुपमा सञ्चालन गर्नका लागि बिहान साढे ११ बजदेखि आवागमन बन्द गरिएको हो ।
चार वटा स्काभेटर र जेसीबी डोजरले सडकमा खसेको पहिरो हटाउने काम गरिरहेको स्थानीय बिष्णुप्रसाद पाण्डेले जानकारी दिए ।
तिनाउ गाउँपालिका ३ दोभान र सिद्धबाबाको बिचमा रहेको हेडवर्क्स नजिकै पहिरो खसेको हो । राजमार्ग अबरुद्ध भएपछि सडकमा सयौं यात्रुहरु बिचल्लीमा परेका छन् ।
दशैंको खुसी साटेर फर्किने र दशैंमा टीका थाप्न हिँडेका यात्रुहरु अहिलेसम्म पनि सिद्धार्थ राजमार्गको सिद्धबाबा क्षेत्रमा अलपत्र परेका छन् ।
सिद्धार्थ राजमार्ग अवरुद्ध हुँदा बुटवलबाट पोखरा, स्याङ्जा, गुल्मी, अर्घाखाँची, बाग्लुङसम्म जाने यात्रु र त्यसतर्फबाट बुटवलतर्फ आउने सवारी साधन र यात्रु बाटोमै अलपत्र परेका हुन् ।
