अर्थ

मादलबाटै २ लाखभन्दा बढी आम्दानी

शिवलाल शुवेदी
गुल्मी । मालिका गाउँपालिका ५ घमिरका प्रेम नेपालीले मादल बेचेरै वार्षिक लाखौं रुपैयाँ कमाउँदै आएका छन् । करिव ४० बर्ष अगाडि देखि जिल्लाको सदरमुकाम तम्घासको मिलनचोकमा मादल बनाउँदै आएका उनले वार्षिक २ लाखभन्दा बढी आम्दानी गर्दै आएका छन ।

Madal Pesa
नेपाली अहिले ७१ वर्षका भए । १६ वर्षको हुँदादेखि नै मादल बनाउने काममा लागेको उनी बताउँछन् । ‘बजारमा माग राम्रै छ’, नेपालीले भने, ‘मादल बनाउन त्यति सजिलो छैन, २/३ दिन लगाएर एउटा मादल तयार गर्छु ।’ आफू सानै छँदा बुवा र आमाको मृत्यु भएपछि यो पेसा अंगालेको उनको भनाइ छ । कुनै तालिम बिना नै मादल बनाउन सिकेको उनी बताउँछन् । दमाहा, ट्याम्को, ढोलक लगायतका नौमती बाजासमेत बनाउनमा उनको अनुभव छ । यीमध्ये बजारमा धेरै मादल बिक्री हुने भएकाले मादल नै बनाउने काम गरेको उनले बताए ।

काठ, बाख्रा, भैंसी, गाई र गोरुको छाला, अंगार, खरी लगायतका सामग्री मिसाएर मादल तयार पार्ने गरिएको नेपालीको भनाई छ । उनका अनुसार मादलको ढुंग्रो बनाउने काठ राम्रो हुनुपर्ने भएकाले गाउँमा काठ खोज्न समय लाग्ने गरेको छ । ‘ढुंग्रोको दुवैतर्फ एकै आकारको भयो भने आवाज राम्रो आउँदैन’, उनले भने, ‘स्वर राम्रो आउन आकार ठूलो र सानो हुनुपर्छ ।’ खिर्रो, मौवा, मलेतो, घ्वारी लगायतका काठको ढुंग्रो बनाउन सकिने भए पनि मौवा र घ्वारीको काठमा स्वर राम्रो सुनिने उनले बताए । ‘महिनाको २० हजार रुपैयाँ कमाई हुन्छ’, नेपालीले भने, ‘सिजनमा त अझ धेरै आम्दानी हुन्छ ।’ मादल बनाएकै आम्दानीबाट उनले घरखर्च चलाउँदै आएका छन्।

आफूले बनाएको मादल गुल्मीसहित छिमेकी जिल्ला अर्घाखाँची, बाग्लुङ, पाल्पा, प्युठानमा समेत पुग्ने गरेको बताउँछन् उनी । राम्रो मादल बनाएको भन्दै आफू पुरस्कृत भइसकेको नेपालीले सुनाए । ‘सिजनका बेला खाने फुर्सद नै हुँदैन’, उनले भने, ‘ग्राहकले २ ÷ ४ दिन पर्खेर मादल लैजान्छन् ।’ विवाह, तीज र दसैंतिहारमा धेरै मादल खपत हुने उनले बताए । गाउँघरमा प्रायः दलित समुदायका गरिब एवं विपन्न परिवारका व्यक्ति यस पेसामा लागेको उनी बताउँछन् । मादलबाट कमाइ राम्रै हुने भए पनि छाला काढ्न र सुकाउन झन्झट हुने भएकाले पछिल्लो पुस्ताले यस पेसाप्रति ध्यान नदिएको उनले बताए । पाँच सयदेखि दुई हजार पाँच सय रुपैयाँसम्ममा मादल बिक्री गरिने नेपालीले बताए । नेपालीले आधुनिक शैलीसँगै मादल बनाउने पेसामा युवा पुस्तालाई आकर्षण गर्न सके गाउँघरमै राम्रो आम्दानी हुने कुरामा जोड दिए । पछिल्लो युवा पुस्तालाई कसरी आकर्षण गर्ने भन्ने चिन्ताले सताउछ नेपालीले भने ‘ यसप्रति युवाको चासै छैन ।’

यता उनको मादल बनाउने पेसालाई घरेलु तथा साना उद्योग विकास समिति गुल्मीले सहयोग गदै आएको छ । घरेलु तथा साना उद्योग विकास समिति गुल्मीका प्रमुख उद्योग विकास अधिकृत कृष्ण प्रसाद पोखरेलका अनुसार कार्यालयले मादल बनाउन प्रयोग हुने साना मेसिन औजार लगायत नगद सहयोग गरेको बताए । अहिले कहीँ पनि मादल बनाउने भेटिदैनन पोखरेलले भने ‘यसको संरक्षण गर्नका लागि र यो उद्योग घरेलु तथा साना उद्योग विकास समिती अन्र्तगत पर्ने भएकाले कार्यालयवाट सक्दो सहयोग गरेका हौ ।’

Show More
Close

Adblock Detected

कृपया हजुरको ब्राउजरमा बिज्ञापन रोक्ने एप्लिकेशन डिसेबल गरेर हाम्रा समाचारहरु हेर्न सक्नुहुनेछ ।